Pase do documental «El Naufragio, 30 años de memoria sumergida», para conmemorar o Día Internacional dos Dereitos Humanos

  • Mañá, organizado pola Rede Acampa, Amnistía Internacional e Foro Cívico
  •  Con guión do xornalista especializado en movementos migratorios e refuxiados, Nicolás Castellano, e dirixido por Fernando Santiago, a proxección repasa a realidade da fronteira sur desde que comezaron a rexistrarse as primeiras mortes no Estreito
  •  Será ás sete da tarde, na sede coruñesa da ONCE. O acto estará presentado pola xornalista Consuelo Bautista e contará coa intervención en liña de Nicolás Castellano.

 A Coruña, 9 DE DECEMBRO DE 2019.- Para conmemorar o Día Internacional dos Dereitos Humanos- que se celebra cada 10 de decembro en coincidencia coa data na que a Asemblea Xeral das Nacións Unidas aprobou, en 1948, a citada Declaración Universal- a Rede Acampa, Amnistía Internacional e Foro Cívico convidan á cidadanía coruñesa á proxección de “El Naufraxgio, 30 años de memoria sumergida”.

O premiado documental, dirixido por Fernando Santiago e con guión do xornalista Nicolás Castellano, especialista en movementos migratorios e refuxiados, repasa a realidade da fronteira sur desde que comezaron a rexistrarse as primeiras mortes de  migrantes nas praias andaluzas. Nel recóllense os testemuños de moitos xornalistas, responsables de organizacións, asociacións e de forzas de seguridade testemuñas desa traxedia tristemente cotiá.

O acto, co que as tres organizacións convocantes queren conmemorar o Día Internacional dos Dereitos Humanos, estará presentado pola xornalista Consuelo Bautista, e contará coa participación, en liña, do propio Nicolás Castellano. Será ás sete da tarde, na sede coruñesa da ONCE, no Cantón.

A entrada, libre ata completar aforo.